今次七月生日之星 Heather 小妹妹既飯局，我地去左佐敦既醉瓊樓。呢度無高檔裝修、無靚女侍應、無頭等服務，因為老店賣既係誠意客家菜。

一號鎮店之寶：白果胡椒豬肚湯。好少地方有得飲，我已經幾年無飲過啦。好清甜，但略嫌豬肚太少。

二號鎮店之寶：梅菜扣肉。呢期我減緊肥，所以揀左件比較瘦既，不過都覺得好香好好食。本來我晚餐要戒澱粉質，都破左戒搵 "靚仔" 送梅菜汁。

三號鎮店之寶：金牌鹽焗雞。肉質鮮嫩又入味，唔錯唔錯。

呢個京都骨拼炸菠菜，真係喜出望外，尤其是個骨，好好味！

除左套餐之外，劉爸爸發板叫左炸大腸、東江豆腐煲同埋骨髓炒三鮮。因為我唔食腸，所以無試，其餘兩個都好味，特別係個豆腐煲添。

唔知係我地食到太夜，抑或佢生意太好，飯後甜品紅豆沙綠豆沙都送晒啦。聽講好得架，緣慳一面添。

可能有人會話佢呢度無 service，但我又覺得幾好喎，起碼侍應們唔會黑口黑面或者扮聽唔到唔睬你。局長最早到，比原先訂檯時間早左一個鐘，我地等齊人先叫野，都無俾人眼啤啤。咁有咁既好處！

是日消費每人 $170，唔算經濟，但勝在有質素。