一向都係 "向世界出發" 既 fans，一年一輯，每次都會睇。
睇左趙雅芝去雲南既幾集，係講中國最後一條紮腳村。訪問左幾位紮腳婆婆啦、介紹金蓮鞋既做法啦，但最震憾應該係婆婆除去金蓮鞋紮腳布，毫無保留地示範行路既情況。
以前既女人如果想嫁得出，就一定要紮腳。雖然紮腳會令佢地好辛苦，一步一驚心，影響埋小腿、腰、背，甚至變成 "抱小姐"，連活動能力都無埋，但係佢地無得揀。
傳統觀念上，女人既目標始終係有一段美滿婚姻。
本來睇完紮腳村，想寫番篇文講而家既女人幸福得多，唔需要再為嫁得出而犧牲自己雙腳。不過諗落，又好似唔係喎，社會只係用左一套新標準去取代舊標準咋喎。
電視雜誌巴士鋪天蓋地式既洗腦廣告，唔係時時刻刻都提醒大家現代既美的標準嗎？
想重拾自信？減肥啦！想搵份好工？減肥啦！想老公錫你？減肥啦！彷彿一瘦能解千愁。
女人們個個都想變成趙飛燕，為達目的而無所不用其極，咩古怪偏方都夠膽去試。如果大家覺得紮腳係變態，咁現今社會追求 "愈瘦愈靚、豬扒無人要" 又變唔變態呢？
女為悅己者容，自古到今女人都無得揀。
我，唯有繼續節食同游水。
