其實大大話話我都飛左十年有多架啦，我覺得自己都算天生食呢行飯。一來因為我 anywhere anytime 都訓到覺，感謝，時差問題細，自然副偈都襟捱啦。至於二來呢，就係我唔怕自己一間房！
酒店多故仔，係人都知啦。每次一有同事講邊間酒店邊間房有咩污糟野，我通常都會盡量閃開，唔理佢真定假，總之唔知就唔駛驚。而且我第六感好遲鈍，基本上瀨野機會好微，咁既然就算有都 feel 唔到囉，就無謂知道啦。
不過今次我閃唔甩啦，飯局講故仔，迫住一路食一路聽。我諗我今次飯局一野打爆個油缸，聽番我十年無聽既故仔！
食完飯，返到酒店房，一個人對住四幅牆。明明 check in 時唔覺得有野架嘛，而家就硬係覺得周身唔聚財。係喎，今次住呢間酒店都出名架喎，本來唔知咪好好地囉。
就響我驚驚地既情況之下，我一支箭標入廁所洗面。洗呀洗，洗呀洗，連鏡都唔敢望，然後九秒九敷塊面膜，paper mask 添。我諗我而家個樣都幾恐佈，hahaha~
唔記講三來添，三來係我份人識得苦中作樂。
