尋日跟一班 Carson and Friends 的朋友去左慈氏護養院表演派對，今次係 C&F 第二次去做氣球話劇啦。

雖然第一次我無份參與，但係聽其他義工講，上次反應好好，院友們都好開心。咁今次我又放假喎，可以幫手，所以就報名囉。不過我唔識扭波，造型組我一定幫唔到手。表演組呢，我又唔識扮鬼扮馬喎。所以，我係推輪椅組！

我地一班推輪椅組既義工 1:00pm 響火車站集合，上到去慈氏護養院之後首先係 C&F 做個簡單既 briefing 先，然後要上一個防感染既課程，跟住我地就帶 d 院友去表演場地。

大約 3:00pm 表演正式開始，有唱歌跳舞同埋樂器演奏，而 C&F 既表演除左氣球話劇之外，仲有魔術添。我見大家都睇得好開心，有 d 身體狀況比較好既，仲一齊拍手一齊嗌添呀。

4:30pm 左右表演完滿結束啦，我地又帶番 d 院友返去自己既病房。有個院友同我唔該前唔該後，而且我見佢笑得好開心，我知佢一定係好 enjoy 啦。

雖然我只係一粒好小既螺絲，只係幫手推輪椅，但係我相信每一粒螺絲都有佢既貢獻。我唔係話自己好重要，我意思係所有好小好小既事，加埋一齊先可以成就一件事。

所以大家記住，勿因善小而不為。